VAIHLOZIAL TUI ?!

          Ka bul ami chuan a sarang chu uluk deuh leh hmanhmawh miah lovin an phelh ri rap rap a, sarang hlui leh khawng tak uk deuh thrat tawh ani nghe nghe a. chuta tang chuan vaihlozial a la hringduk lampang a tawn a rawn phawrh chuak ta a. Uluk deuh mai in a meizial chu a tan a, a pak khu talh talh a, a kai chiang ta maw tih ah chuan a hip ta veng veng mai . 

     A khumbeu khumlai chu a hmathlawk ah vuanin a la thla a, a awm bawr vel chu a zap hliau hliau a, tlem in a hnunglam ah a'n thu awm deuh a, ral leh lam thlir pah chuan a meizial chu a si vang vang mai. A tui hmel in amah pawh chuan a hahdam pui hle hian alang a. A awhawm ang reng roh khawp mai.

      Chutah ka lam a lo hawi a, a meizial paina sarang atang chuan vaihlozial pakhat a rawn phawrh a; ngawi reng in min pe ta a, keipawh chuan ngawi rengin ka la a, lehlam min hawi san leh pah chuan a lighter chu min rawn pe bawk a.

       A thut dan ang chuan ka'n thu awn ve a, a tih dan ka hmuh ang khan meizial chu ka'n pet kawh ve va a, lighter chu kan tlalh alh phat a, ka meizial peh kawh chu lakai turin ka'n hliau ve ta a. 

      Mahse, a dik ve ta hauh lo mai, ka meizial peh kawh ve chu apang a rawn alh zuai mai, hmui a sat zuai pahin hmuihmul kang rim in hnar a rawn verh nghal zawk mai. Chu mai ala ni lo, ka fawh zawng khan vaihlo them in ka hrawk a rawn deng kha fawk a, ka meizial hmawr lah chu a arh turh mai bakah; vaihlo kang mut deuh leh a mei si te leh a vaihlo te chu a  pawr hluai a, ka malpui leh ka dul zawn ah te chuan a si leng te chu  a rawn tla bawk a, mei si chuan ka kekawr leh kawr chhan ah pawh min ti phu zawk mai. Ka tho hluai a, ka malpui vel ami mei si chuan  ka thawmhnaw a kan hlau in rang takin ka vai kiang a, ka in beng ta mawlh mawlh a, hmun hnih ah chuan ala kawng pawp hman tho mai tih ka malpui sat dan teh zak ah chuan ka hrethiam nghal a, ka zuk bih a alo dik ngei reng bawk a.

      Chutia ka phusak na lam ah chuan ka vaihlozial peh kawh lam kha ka lo ngaihven tawh lo a, ka kun zawng chuan a vaihlo kha a rawn baw chhuak zo titih ta vek mai bawk a, han zuk zui tlak ani ta lo. Inthiamlo deuh takin vaihlozial min theh tu chu ka va melh a, ani chuan “Vaihlo tui zu thlak pawh I nih nek loh kha” a lo ti dut  a.

2012 Christmas

( Dah ve hrim hrim teh ang)

Mi mak pui pui, hmel lang lo lek a inthuam lum sawm chuang zet mai chuan nghah neiin puan in chhung ah beiseina sang tak nen kan in melh hruk hruk a.

Christmas a ni. Kan awmna hmunin zir lo mahse engnge maw tal  tih ve kan tum tlat a, a theih dan danin rem kan ruat ve a. Chhun lam ah kan piah mual a inkulh te zing ah chuan puithiam deuh reuh pakhat a awm tih kan hre chhuak a, chu pa chu he mi zan min hmanpui a serh leh sang te min hman sak turin kan va bia a, phur takin kan neih ang kan vawm khawm a puan in te pawh tlereuh kan kawl ang angina ka chei ve a, kan eitur neih ang ang kan buatsaih bawk a,chu mai duh tawk lovin Christmas cake neih ve ngei kan duh avangin kan zinga pahnih chuan khaw lam hla takah chirstmas cake lei turin an thawk chuak a, vur a tam avangin kal peih awm loh tak a ni, mahse Christmas boruak in min nang tawh tlat a, phur takin an liam ve mai bawk a. Chawhnu lam chu zanlam hun atan inbuatsaih nan kan hmang zo a ni deuh ber mai.

Tlai ah chuan khawthim rual deuh thaw in chaw kan ei a, zanlam a kan hun hman tur chu kan helhhawlh a ni deuh ber mai, kan thu khawm leh lut lut thin, awki pawh a zangkhai vah hlawm mai, ni dang a biak tawng zawh loh te pawh an khi ve vur vur mai, khawvawt er let nan a in lam pawh inthlahrung lovin kan lek fur a, kan ‘merry’ a ni ber.

A hun a lo thleng a, kan puithiam chah chu a lo thleng ta ni tur a ni, pawn lamah chuan  phun ri a rawn awm a, kan eng neih ang ang nen chuan pawnlam ah chuan kan chhuak ta hlawm a.

Pawn ah chuan palian pui mai vur bawh luk mai hian, a kawr vel a vur kai chua  alo beng thla mawh mawlh mai a, a khabe hmul leh a hmuihmul vel ah vur a awm luai avangin Christmas putar te pawh ni ve mai thei hmel hi a ni a, chutia kan va chhuak min lo hmuh chuan kan lam a lo pan a, a bul hnai ber a mi zu um ken lai chu a pih thlak sak a, vanvadak meuh in a khiat ta a, chutah amah chu hun min hmanpui tur a lokal a ni tih min hrilh a, puan in chhunglam ah chuan kan in zui lut ta hlawm a.

Kan puithiam lo thleng thar chuan min han chibai kual a hming te kan han inhrilh zawh hnu chuan, hunserh ang reng chu kan hmang ve ta a. A hmasa ber ah chuan kan puithiam chuan anmahni hnam tawngin an tawngtai a,eng ber nge a sawi pawh kei chuan ka hre lo, chutah ka Christmas thuchah hriat tawh a tawi ber mai a sawi a, a thu sawi chu , “ Merry Christmas you lot, let’s get drunk!” tih zawng a ni.

Phunnawi kan awm chuang hlei lova, a tawngtai kan amen rin tlan dan ah khan kan lungawi tlang tawk a ni ngei ang. Kan neih ang ang chu chumi zan atana kan lo khek ruk deuh a ni hlawm bawk a kan hnianghnar ta phian hlawm mai, ti ti pawh a kal awki pawh a ring sawt ta viau mai tih ah chuan kan Christmas cake kha ei tur in kan thu bial a, kan puithiam rawtna ang in kan ei hma in ‘Silent Night’ tih chu ring mangkhen in kan han sa hmasa phawt a, chutah puithiam chuan cake bawm chu a han hawng a, rei lo te ngawi rengin a zuk bih a, chutah za lutuk tak mai hian a nui let ta tawp tawp mai a, a ngaihna kan hre lo hlawm kher mai.

Kan puithiam nuihza zual pui a reh hnuah chuan cake bawm chu a kawk a, a chin chu la sawn turin min hrilh a, a hnaih ber ka nih avangin a chin chu kan hawng ta a, kan cake chu itawm takin a lo lang heu mai, mahse a chunga a cheimawina ni pah fawm a, an thu ziah chu kalkawng ah a leitu te hian an kenna lam ah an ti pherh ni tur a ni, chiang tak a chhiar theih awm chu, “Merry ..... as” tih chiah  a ni. Kan puithiam chuan chu chu kawk in, “Merry Ass” a han ti zui leh nghal a, kan ho zo ta vek a ni ber awm e, kan khi ta hei hui hlawm a, 2012 Christmas chu hlimawm takin kan hmang liam ta a.

Darthlalang

Darthlalang a tuihu chu ka hai fai a, pa pakhat hian min lo melh reng mai, chiang em em maiin ka mitah tak min lo en a, ngawi rengin kan in melh ta.

He pa hi ka hriat tawh thin a ni. Mipa naupang mai a nih laiin an hruai a, hmun pakhat ah an dah a, chutah chuan ruler leh lehkhabu kawmdum a awm. Chung thil pahnih hmang chuan thil tam tak an lo zirtir a, a ngaihdan leh duhdan te a hmuh leh a hriatdan tam tak te chu ruler leh lehkhabu hmang chuan an paih thlak sak a, chung thil pahnih hmang chuan dik leh dik lo te, tha leh tha lo te pawh thliar a teh thin turin an zirtir tlat a, hla tak a lawmman duhawm tak chu an khawh hmuh ta a.

Chu lawmman duhawm tak chu la turin an tir chhuak ta a, hla tak a lawmman la tur chuan theihtawp chhuah a tlan zel turin an fuih a, chu lawmman chu a damchhan leh a pianchhan ni hial awmin an hrilh a. 

Tichuan, theihtawp chhuahin lawmman lak tum chuan a tlan ta a, a tlu a, a bawksawp a, a inhliam a, a duhzawng leh ngainat zawng te pawh a kalsan zel a, ruler leh lehkhabu chu hmanrua ah hmangin thi leh thau pawlhin a bei ta chiam a, a tawp ah chuan lawmman chu a va hnaihchilh ta a.

Chu lawmman hlu em em leh ropui em em a an sawi chu a ban a, a kutin a chawikang ta a. Hah tak leh theihtawp chhuah a a lak a nih avangin a hlut hle a, lawm takin a awmah a pawm bet a, hlim em em in a nui chhuak ta hial a, rei tak chutia a lawmman a pawm beh hnu chuan  a lawmman chu enchian tumin a han bih hnai ta a, a kut ah chuan a mawina te chu a da zo ta mai a, a lawmman lak ‘hlu tak leh ropui tak’ ti a an hrilh thin, theih tawp chhuah a; a lak ngei chu a ken lai reng chuan a mawih a, a tla darh zo ta a, thli a lo thaw a, a len bo zo ta. Thudik ziktluak lo leh zirtirna famkim lo a dawng a ni tih a in hrechhuak ta a.

Lawmman latu chu a khua a har ta em em a, a bul tanna leh a kalkawng te chu a thlir kir a, a hmanrua ruler leh lehkhabu te pawh chu a bih chiang a, hrilhhai takin kal lehna tur hre lovin a ding ta reng a. kalsual nia inhriatna a nei a, a kalsualna lai hriatchhuah tumin a hawikir a, mahse a mittui avangin a khawhmuh a fiah thei lo.

Min melh rengtu chu ngun leh zualin ka bih a, mihring ruak leh kawrawng mai ka hmu a, a mihring nihna tak pawh chu a zirchhuah finna te, hawihawmna leh a behbawm chuan a khuh pil bo zo tawh a, ngun lehzualin ka bih a, a mitmengah chuan beiseina eng tlem ka hmu a, chu eng te reuh te chu chem alh chuak zo tak maw?

Ngawi rengin hmuihmul pawh met ta lo chuan darthlalang chu ka kalsan ta a.

Kuhva

Facebook group pakhat ah  vai kuhva thlalak mawi tak post ka hmu. A hma ni chiah hian cigarette lei pahin vai kuhva dawr bulah ka tei mai mai a, ka tih tur nei lovin vai kuhva ei te chu ka thlir vel a.

Kuhva hi ka ei ve lo han ti dawt ila, tlem ka daw deuh ang. Thlakhat ah pahnih khat ei chang ka nei leh zauh thin, mahse zarda paan leh a dang chi ho; bawlhlo tam deuh  ang chi  hi ka ei ngai lo a, ka ei chuan a kuhva hring midang min pek a ni deuh ber mai.  Mizo kuhva ei tam zawk hi chuan kuhva hring hi an eiin ka hria, sarang a an pack atang hian panhnah an la chhuak a, an duh tawkin chinai an tat pherh a, kuhva rah nen an hmawm mai thin. A heh deuh phei chuan an thial zo zung zung a, a dang an hmawm zawm leh zat mai thin, nikhat a an ei zat pawh a tam thin ngawtin ka ring.

Ka vai kuhva ei hmuh ve thung hi chuan a siam tupa ‘pan wallah’ chu a rawn din chilh a, kurta var suit nen, savun uk a siam chapal a bun a, a sam pawh uluk takin samkhuih thla lang raihin a tukhum lamah pial takin a khuih let vek a, ka rinthu mai maiin a sam rim hi hnim ila chuan Keo karpin hair oil rim a nam chek tur ah kan dah ngawt bawk a, a ban dinglam ah sana a tak leh a bunna chain rangkachak rawng an bun bawk a.

Paan Dukaan dawr hma a mi coca cola bur dahna bawm sen chu a ke dinglamin a rap a, a hmalam ah tlem ding awnin a kiu dinglam chu paan wallah  in, a kuhva siamna atan a tih  counter ang reng, aluminium phek an phah, a khat tawk a pawnchhe hnawm a a hruk sek sir kil khat ah chuan a nghat a.

     Ti chuan a kuhva duh zawng chu a zuar tupa chu a siam tir ta a, bur te reuh te te amah hual vel tu chi hrang hrang chu a kawk kual zung zung a, ka rin ai daih a tawngkam chaltlai chuan a dawr lehnghal a, a duh zawng thenkhat a telh belh tir a, a then erawh telh tam a hlau hle bawk a, a vil uluk khawp mai.

 Tin, a duh zawng pawh a chiang hle nitur a ni, chi hrang hrang pawlh tur a han sawi tak tak chu kuhva siamtu pawh a vir zak zak mai, a dinglam leh veilam ah te, a hnunglam ah te bur teruh te te a ban lawr nasa khawp mai, a thuhdan pawh kuhva pakhat siam turin vawithum ngawt a siam rem hmanin ka hria. A tir chuan a bawp dinglam ti tungin a bawp veilam a ti zawl thung kha a nia, a siam zawh meuh chuan vaipa thutdan pangngaiin bawp khawkherhin a kephah a thuhbet tawh . Duhtawk a an in siam sak hnu chuan keini ang duang kelsa kan tum a bawlhlo kan telh let zet a tam tur bawlhlo eng eng emaw an telh ni hian ka hmu a, an thil telh atanga a lan mai dan ah chuan lapawchini naran ai chuan a tlum tui daih tur ah ka ruat deuh ngawt a, vai pathian naran hnen a inthawi nan pawh iai awm loh tak a ni.

Chutia duh ang thal a an siam zawh hnu chuan , a siam tupa chuan panhnah chuan a thil siam chu a fun khawm a, a siamtir tupa chu a hlan ta a, anin a kut dinglamin a lo la a, ka khat hmakin a hmuam ta a, ka khat tun chung chuan a siamtupa chu chinai a la dil belh ta fo a, a ni pawh chuan chinai tlem chu panhnah kuangah a tat a; a pe ve thuai bawk a, chu chu a kut dinglam kutzungpui leh kutzunglai in a chelh a, a kutzungchal erawh a ti pir kawh vah thung. Lungawi hmel takin a kuhva chu a thial tan ta a.

A lan mai dan chuan a hapui dinglamin a thial ni ngei tur a ni, a biang dinglam a puar talh talh mai, a mawi tawk vel a thial hnu chuan a inher a dawr sir ah chuan chil a va pik puat a, a rawn inher let leh a , panhnah kuang a a chinai ken chu tlem an liah belh leh zeuh a. Chutia a thial pah chuan paan wallah chu eng eng emaw a sawi pui a, a chang leh zahmawh titih deuh te a sawi a, a chang leh midang chanchin te a sawi a, cricket match chungchang te a sawi bawk a, a sawi zawng zawng erawh ka hre ta lo. Rei fe a thial hnu chuan a hma a a tihdan tho khan chil a va chhak leh a, mahse a kuhva thial lai chu a leiin a hapui veilam ah a hnawl phei ni awm tak a ni, a biang veilam a puar ve ta thung a, a ngai te bawkin chinai tlem chu a liah belh leh a, a mobile phone a phawrh a ring takin tu emaw chu an be leh ngial a, a chang leh a nui a, a chang leh tawngkam mawi vak lovin a fiam ni berin ka hria, amah lah chu a hlim hmel phian lawi a.

Chutiang zel chuan a in dawt dan pangngaiin a chil a chhak a, chinai a liah belh leh zel bawk a, a hapui dinglam ah leh veilamin a thial chhawk reng bawk a, ring tak a titi zel a. ‘kuhva pakhat a ei chhung a reiin a va manhla hmel mai mai e aw’ ti rilru chungin ka thlenna hotel lamah inbual turin ka kalsan ta a.

Lehkhachaih Thu

Ka muhil tui lai hi ka phone khur vel chuan min tiharh a, zanlam menrei nen lawm vak lo chuan ka han ban hram a, men pawh meng tha peih lo chuan, ngaihnobei lo fahran hian 'Hello' chu kan ti ve hram a, min rawn chhawntu aw ka hriat meuh chuan ka thu chhuak zawk mai, phur ru ang reng deuh tak chuan ka be chhunzawm ta a.

Ralkhat atang pawhin a aw ringawt pawh hian engtin emaw deuh tak hian min hnen a, ka lungawi ru veng veng mai, thil ropui em em han sawi phei chu kan nei lem hlei lova, i lo haw dawn hnai tawh em? chuti khati a rawn ti kamtha mai a lo ni a, kan inbiak lai chuan an nau mipa naupang lian ve tawh ang reng tak chuan min biak ve a duh thu min hrilh a, kan inbe ta a.

Chu nau chuan thil sawi tur a nei tam lo, thil min chah duh a lo ni a, a thil min chah lah chu ka hriat ngailoh lam tak 'Lehkhachaih' a ni hu mai, lehkhachaih naran a ni lo 'Patang' a nia a rawn ti a, ka hriat chian loh hlau takin min hrilhfiah ta erh a.

Kan inbiak zawh a phone ka dah chu, ka inngaihtuah bial mup mup mai. Ka thlenna hotel hi chu AC a ni ve mial a, room a awm hi chuan boruak lum sa hulh hulh in min ti buai lem lo, mahse pawnlam boruak a han vah chhuah chu ka peihlo ngang mai, dik tak phei chuan ka peih loh em avangin ka tih tur pawimawh thenkhat pawh ka thulh phah hial a ni. In hriat kha Delhi lum vanglai tak khawlai a thil zawng tur a in tirh chhuah ngawt mai chu a peihawm loh full.

Mahse, 'patang ' chu ka hawn si loh chuan ka hawn hunah ka leng duh awm sia, a nau chuan min lo zawt ngei ang, a u te'n an duat rawn , an atchilh rawn a ni roh bawk sia, ka hawn loh vaih chuan a u lakah hian mark score san a har mai pawh ni lo, ka point lo hmuh tawh sa pawh kiam deuh dawk dawn a hriatna ka nei bawk si. Dinhmun a va khirh ve, a tu teh lek chuan nge maw, kan nau-a pawh chu 'patang kite ' te lo hrilh hre reng reng chu ni maw, thil tullo tawp hi enge maw an lo sawi hmawrhmuh thin, hetiang thil hriat zawng zawng sawi zawt zawt hi hi IPC ang zawng te hian hremna dan la siam se a tha ang, ka ngei zawng tak an ni.

Reife ka inkhap hnu chuan, 'khawnge thih leh thih, a u lakah tlaktlumna remchang alawm' ti chungin Delhi khawlum sa hal hulh hulh hmachawn tur chuan ka tho chhuak ta nge nge a.Naupan lai atang a thiltha beisei tur leh a hun ah chuan  tawrhna te pawh hmachawn zel tur a hrilh fin leh , thil reng reng a eng zawng a thlir thiam tur a namen lova zilh, hauh leh vauna te hial pawh lo tawng tawh ngang kha ka ni a, ka thil tih tur pawh chu ka peih emaw peihlo emaw lam dah tha in, chu thil avang a ka tan a thil tha lo thleng tur lam chu ka ngaihtuah lui tlat a, ka hawn hunah ka  'patang lehkhachaih' hawn nen ngat chuan ka va leng ang, a nau chu a lo lawm em em ang, a nau a lawm em avangin a u chuan min ngei hluah hluah lo tawp ang, chuti khawp a a nau lawmzawng ngaithuah peih chuan a lawmzawng tih ka peih dan tur te pawh a ngaituah chhuak ngei ang, nula tan an lawmzawng ti chak ngawih ngawih mipa chu.... aaa.! sawi thui lo zawk ang.

Ti chuan, phur takin hotel atang chuan ka lim chhuak a, khawlum lamin min tibuai phak ta lo, ka ngaihtuahna thinlung lam chuan min hruai a, a vah hian ka vak thuak thuak tawh mai, vai kawngkal te, taxi pute, dawrkai te leh a biak tlak hmel deuh te zawt chawp zelin Old Delhi lam ah ka vak lut ta hial a, chulai a lehkhachaih chu an fak viau hlawm a, an lo ngaisang hrep ni tur a ni, ka rinai daihin an lo hria in min kawhhmuh tu tur ka tawng hnem, lehkhachaih lar tak a lo nih hrep awm chu!

A hmunah chuan lehkhachaih chu a lo tam nangiang mai a,an lo tiang vum hner hnur mai a, uluk em em in a rawng inchawih mawi deuh leh a siam fuh deuh nia ka rin chu ka lei ta a, ti tha inti em em leh hlawhtling inti em em in ka thlenna lamah ka kir pui leh ta vang vang a, tu emaw khan min rawn be leh se aw, ka thil zawn dan vel chipchiar tak a han hrilh ka va chak tak em, nge inti pa deuh takin bul deuh hlekin ' E, kha kha maw, lei tawh e' ka ti chhum deuh vat zawk ang, tih mai mai te  ka’n ngaihtuah kawngtluan pek kha..

Chu lehkhachaih hrep chuan haw kawng a min tibuai nasat zia chu sawi lo law law mai ang, a thleh theih si loh, bag ah a khung ngam bawk si loh, ka keng ka keng ta mai a, a hmelhem palh ang tih hlau reng reng in kawng tluanin ka veng hi a ni ta ber a, engah nge a chhiat palh takin ti a pathum tal a spare ah ka lo leibelh loh, tiin mawl te hi ka inti leh hluah hluah thin a, ka damchhung hian chutiang the hrep chuan lehkhachaih hi ka la veng uluk ngai lo, ka veng leh tawh pawhin ka inring lo ve.

Chutah leh, zin haw tuk zanah ngei mai chuan hmel uang deuh tak leh titha inti rilru veng veng chung chuan a 'changtunu' te inlam ah chuan chalsam hlim vawk khawpin chu lehkhachaih hnungpuak chung chuan ka lim phei a, kawngkhar bulah te chuan a hmelhem em, nalh lo lai leh himlo deuh lai te hi a lo awm palh em, tiin ngun em em in ka'n endik leh te te a, fel lohna liantham ka hmu lo.

'Confi' em em in inchhung ka luh pui a, min lo lawm der ham ham phian a, an mipa naupang lehkhachaih ka hawn ber chu an thenawm ah a lo leng ve a, an va ko haw chawp chuk chuk a, an koh hlan te chuan hmanlai pasaltha ramvak hlawhtling, sa naran nilo, sairam chhhuak hlawhtling ang deuh ah te ka lo inchan rilru a, ka hah hi a damin; chu lehkhachaih avang chuan nasa tak a chawimawi a awm mai tur hian ka lo inkau nasa mai a, ka lei dan leh hawn dan kimchang min zawh paw'n mawi tak leh ropui tak a sawi dan tur te ka lo ngaihtuah fel thlipthlep a. Nun hi a va nuam em...

Chutah an nau chu a lo haw a, kha le i lehkhachaih chu 'patang' dik tak a nih hi tiin, chhuang ru deuh takin ka lo pe ta ngei a. A la a, a en vung vung a, a lek kual a, a hnunglam a en a, a hmalam a en leh a... A pa lam a hawi a,' Hetiang ka duh lo, a vai em mai' tih leh chhuat a paih a rual ta a.

Ngawi tak rawh nauhai, i chhungte hmuh loh hlanin ka pen dawn chiang lutuk ringawt che...

Jail - I

Thil ho mai mai ka’n sawi teh ang. Politician leh ram hruaitu ka ngaihsan deuh deuh ho hi Jail bang zut tawh an lo ni fur mai a, Jail hi a chhan tha tak a awm chuan tan hreh em em tur pawh a lo nih loh hi; tih ngaihdan te ka neih phah ta hial a.

               Ka tleirawl lai hian keipawh mi ropui te dungthulin jail hi ka tang ve tawh a, ka tan chhan erawh chu, ram siam that duh vang leh thildang chhan tha tak phei chu a ni ta chiah lo deuh a. kan college kal lai exam zo, in lam a chawlh rawn hmang  thawveng lutuk vakvel kha a ni deuh ber mai.

'Ka pinic e' te kha kan tia, “Insual bur bura ruaithehna in ai chuan Inrem taka chaw thing bâr khat eina a tha zawk.” tih thufing te kha kan lo mang nghilh ta roh pek a, haw kawng ah te chuan kan la in tin ta uaih uaih mai a. Vanduaithlak tak maiin police rual khat zet tei rawlai mai mai nen kan in nang ching zui leh ta nghal a, min tingmit ta dial a. A tuk lamah roreltu hma ah kan inlan a, thildang tel lem lo pawhin kan rim diklo ringawt pawh jail bang zutna tham kha a lo ni bawk sia, chawl hahdam turin Jail lamah min thlah liam ta dial a. A no zual pahnih khat kha chu an chhung te khan an rawn la chhuak mai a, ka chhungte ve kha chuan ‘tawn hriat ngah hi finna a ni’ an ti deuh ni tur a ni, pip e pup e an rawn ti lo.

Tang phurhna motor phui tha tak maiin min phur liam a, Jail office kawtzawl ah chuan a vawikhatna atan min han chhiar a, office ah kan hming leh tuldang te min lo ziak lut a, min buk a, kan san zawng an teh bawk a, min dap a, kan pawisa ah te min laksak a, fel takin an chhinchhiah thlap a. kan awmna tur ward te an tih fel hnu chuan kawmawl bal pui pui an vawm vum thur chu min kawhhmuh a, a tha deuh deuh pathum ka thlang a, thlan tur a vang kher mai, a thar tirh atangin vawikhatmah la suk loh tih hriat ngawih ngawih vek a ni, a tet nasa lo deuh thlan chu a ni deuh mai, no lianpui leh thleng min pe leh tawp a.Tichuan, duhthlan theina ka lo neih ve thin ang chi zawng zawng deuh thaw chu a tawp chawpchilh nghal ta vek bawk a.

Thim hnu a lut kan ni bawk a, jail warder pakhat kan zui a, kan tanna ward tur lam ah kan kal ta thliah thliah a, ka awmna tur chu Ward- VI B a lo ni a, ward dang anglo takin khum awm lovin chhuat ah an lo mu vek a, mi sawmli dawn lai an lo awmsa a, mi pali panga vel tih loh chu an vai chuan an balh hmel vek mai. A then chuan mi lo melh hru a, a then chuan  en pawh min lo en lo hian an thiltih lai an lo ti miah miah thung a. Kawngkhar te an kalh fel a, jail warder te an kal fel hnu chuan a lut thar ho zawng chu min din tlar tir a, thil kalphung te leh awmdan te min han hrilh hlawm a, tih tur leh tih loh tur a lo awm teuh mai. A mal te te in mahni hming leh veng leh tan chhan te sawi tur a ni a, ka sawi hun a lo thleng ve a, ka din dawn lai chuan midang hnunglam atang chuan pakhat hian, “Nang chu a ngailo, thu raw” min rawn ti a, mak ka ti kher mai, a sawitu ka hmu chiang thei bawk si lova, ka ngaih te a tha lo rum rum mai.

( Ka peih tawh lo, peih hun a chhunzawm ah)

Pangpar Mal

 Pangpar mal te hi leiah a lo tla nget reuh a, a ro rep reuh lehnghal a..

  Ka la a, ka enchiang a ka rilru in ti hian ka ngaihtuah ta mai mai a. He pangpar lo insiamna tur a Pathian thil remkhawm nasat zia hi, a kung a awm hmasak a ngai a, a kung chuan leitha leh nieng te leh tui te a mamawh vek a, ni eng awm tur chuan ni a awm a ngai a, ni eng a tawk chauh va hmu tur chuan ni leh khawvel inkar hlat zawng hi dik tak a dah a ngai a, a tawk chiah a an inhip tawn theih nan gravity tawk chiah an neih a lo ngai ve zel a. 

    Chung zawng zawng a lo awm theih nan chuan solar system naran ni lo, life support thei a awmthei nan galaxy siam a lo ngai leh a, galaxy te pawh a lo awm theih nan tiin big bang theory te thleng thlengin ka ngaihtuah ta a.

     Chuan khing ho zawng zawng dik leh felfai tak a rem khawm a nih hnu chuan he pangpar hi a lo par chhuak thei ta chauh a ni.

    Ni hnih khat lek ah a vuaiin a ro leh vek si a........

Inkhawm Report Tawi

        Meizial an paih sup sup mai, Biakin kan thleng hnai tawh a ni. Biakin pawn ah chuan rawlthar fai ving veng te hian min lo chiau au; min duhsak hrep a niang chu, khuang vawtu thutna hnunglam tlar thumna ah min nghat rup mai.

        Kan zai dup dup mai, kei leh keilo ang takin ka hla bass thiam zawng kan sa bawk a, ka duhthawh ve khawp mai. Dar a ri a, inkhawm tan a ni, hruaitu a lo ding a, thu tha pui mai a chhiar dap dap a, ropui tak a ni, mahse eng thu nge a chhiar kha ka hre chuak zo leh tawh pek lo!

        Ziaktu an sawm a khunkhan takin kohhran mite hriat tur a puang zat zat mai, a puan hnem reuh nen a ziak a bih mang der lo, a fakawm phian, news puangtu a tan a tha phian ta ve ang.

        Thawhlawm an khawn ta, kan veng tleirawl hmel lamah pawh a zia pawl hlir kha zei tak maiin an lo chhuak a, felfai takin an insem darh sang sang a, tlar hnunglam atangin an rawn khawn a, a mimir naran hovin a background music ang reng atan hla kan lo sa ho leh a, kan tlar a thlawhlawm rawn khawntu chu a che lo reuh khawp mai, ka bula thu hian pawisa chu ngah hmel deuh se chuan ka thlawhlawm bak hi puk belh sak ka duh rum rum mai, ‘A thilsiam te chu a en a, tha a ti em em a’ tih te kha; awm hliah hliahin ka’n hre thar leh a, Kan Lalpa hi ka dem mawlh lo.

        Urhsun takin kan thlawhlawm lakkhawm chu kohhhran puipa pakhatin a hlan thianghlim a, eiruk sum leh sum thianghlim lo pawh ngaiteh, an lo thianghlim ta!

        Thusawitu an sawm a, pulpit ah chuan a lawn a, hun duhawm tak kohhran ten an ruatsak chu lawmthu rei fe an sawi hmasa te te a, kohhran upa ho thutna lam ka va melh a, upa pathum chu an mutthlu chiang mai, pahnih dang leh chu an muthlu nge muthlu lo hriat har takin an awm thung a, pakhat chuan eng emaw ni lekhabute ah a ziak mawlh mawlh mai thung a, engnge a ziah ka hre lo, thil pawimawh tawpthang ni ngei tur a ni, inkhawm lai a ziah ngai ta chu, dang chu an tha e.

        Mipui han phu deuh suau ah ka harh hlawl mai, kan upa te hnung zuiin ka lo muthlu ve a nih dawn hi. Pathian kan fak leh chawimawi nan hla sa turin an lo ding vek tawh a, inthlahrung der takin ka ding a, kan zai a, he mi a kan hlasak hi chu ka bass thiam ta lo. Pastor in malsawmna nen thlap in inkhawmna a ti tawp a, kan bang ta. Inkhawm hi chu a va inchhir awm loh tak em, inkhawm ve lo ho hian inkhawmna chang hi hre ve mawlh teh u.

Chhawkhlei Par

Phawngpui tlang ( Blue Mountain ) a chhawkhlei par leh far pak, far pak tih a pak hi Lai tawngin pakhat tihna an ti, helai hmunah hian hmanlai chuan far kungkhat a mal din thin a ni awm e, tunah chuan an phun belh tawh, Phawngpui tlang chhip thlen hma a mi a ni e..

 Chhawkhlei par

Chhawkhlei par

Ni enkhalh zawngin

Far pak

Farpak